Skip to content
 

гл. 1 подобен Небесных чинов

Успе́ние Пресвя́ты́я Богоро́дицы Мари́и.

гла́с 1. Подо́бен: Небе́сных чино́в:

Безсме́ртным успе́нием Бо́жия Ма́тере, / а́нгельский собо́р ра́дуется: / и сия́ отходя́щи, / во оби́тели ве́чныя вселя́ется, / и к весе́лию Небе́сному преходя́щи, // в Бо́же́ственную ра́дость и ве́чное наслажде́ние.

Жи́зни вы́шния жела́ющи, / сию́ оста́вила еси́, Богороди́тельнице / отрокови́це, де́вства цве́те, / Христа́ ро́ждшая все́х живота́: / благогове́йно предстоя́ше апо́стольский собо́р // честно́му твоему́ погребе́нию, Богоневе́стная.

Твои́м исхо́дным пе́нием и надгро́бным, / возду́х у́бо освяти́ся, / восхожде́нием твои́м, Ма́ти Бо́га человеколю́бца, / чу́до стра́шное, Богоро́дице неискусому́жная. / те́мже ве́рно покланя́емтися ве́рнии, / / Богоро́дице неискусобра́чная.

Рома́на Сладкопевца, гла́с 1. Подо́бен: Небе́сных чино́в:

Краснопе́снивая цевни́ца / Боже́ственнаго Ду́ха, / слави́й и щу́р Боже́ственных пе́сней, / свире́ль це́рко́вная, / все́м на́м своя́ предлага́ет сладкопе́сненная учрежде́ния, / / и те́ми весели́т Богому́дрыя.

Светле́йший свети́льник и проза́рнейший, / сладковеща́нная гу́сль, / струна́ благознамени́тых Ду́ха слове́с, / пое́т я́сно науча́я концы́, / немо́лчными пе́сньми славосло́вити // Боже́ства́ еди́ну зарю́.

Ты́ Влады́це все́х я́ко предстоя́, / и дерзнове́ние, о́тче, к нему́ стяжа́в, / на́м соверша́ющим па́мять твою́, / и све́тлое твое́ торжество́, / моли́ изба́витися бе́д и напа́стей, // Рома́не Богоблаже́нне.

Свя́то́е Преображе́ние Го́спода Бо́га и Спа́са на́шего Иису́са Христа́.

гла́с 1. Подо́бен: Небе́сных чино́в:

И́же с Моисе́ом глаго́лавый дре́вле / на горе́ Сина́йстей о́бразы, глаго́ля: / а́з е́смь Бо́г сы́й: / дне́сь же на горе́ Фаво́рстей преобра́жся, / началообра́зное показу́я, луча́ми облиста́яся. // те́мже, Христе́, велича́ю твою́ си́лу.

Пое́мь осо́бь твоя́, Христе́, ученики́, / Петра́, Иа́кова и Иоа́нна, / во́лею на го́ру си́х возве́л еси́, / чу́до стра́шное показа́в, и нестерпи́мое / Бо́же́ственнаго прише́ствия твоего́ издале́ча / / присносу́щное благоле́пие.

Твоего́, Христе́, прише́ствия непостижи́маго / тре́петни бы́вше апо́столи дре́вле, / ни́ц на зе́млю па́дше, / Боже́ственней твое́й дивля́хуся си́ле: / со́лнца просия́в светле́е, Бла́же, / / неизрече́нною си́лою Твое́ю.

Происхожде́ние честны́х Дре́в, Честна́го и Животворя́щаго Креста́:

гла́с 1. Подо́бен: Небе́сных чино́в:

Небе́сная ше́ствия, / Крест честны́й гото́вит все́м, / тому́ покланя́ющимся ве́рою несумне́нною: / и лико́м невеще́ственных си́л, / и́же на не́м пригвозди́выйся, / сочета́ет любо́вию пою́щия того́. (с. 55)

Кла́няющеся ве́рою Кресту́ честно́му, / на не́м распе́ншагося воспое́м Влады́ку: / того́ манове́нием / устне́ вку́пе и ду́шу очища́юще, / и сия́нии сего́ мы́сленными уясни́мся, / хва́ляще его́.

Го́ресть дре́вле услажда́я моисе́й, / изба́ви Изра́иля, / о́браз Креста́ напису́я: / мы́ же сего́ вси́ ве́рнии, / та́йно и Боже́ственно вообража́юще в сердца́х на́ших, / всегда́ спаса́емся держа́вою его́.

Написать отзыв

Вы должны войти, чтобы оставить комментарий.